வள&#3021;ள&#3007;ய&#3010;ர&#3006;ன&#3021; க&#3007;ற&#3009;க&#3021;கல&#3021;கள&#3021;

திகாட் ஃபாதர் - ஒரு வரலாறு (பகுதி2)

திகாட் ஃபாதர் - ஒரு வரலாறு (பகுதி3)

திகாட் ஃபாதர் - ஒரு வரலாறு (பகுதி4)

செவ்வாய், 25 ஆகஸ்ட், 2015

தி காட் ஃபாதர் - ஒரு வரலாறு (பகுதி4)

Posted by Thangaraj Pazhanee on 6:19 PM

தி காட் ஃபாதர் நாவலை படமாக எடுக்க போவதாக பாரமவுண்ட் பிக்சர்ஸில் இருந்து அறிவிப்பு வந்த அடுத்த நாளே அடுத்த சிக்கலாக வந்து நின்றவர் ஜோ கொலோம்போ. சிசிலியன் மாஃபியா குடும்பங்களை உள்ளடக்கிய ஐந்து மாஃபியா குடும்பத்தில் ஒன்றான கொலோம்போ குடும்பத்தின் தலைவர் தான் ஜோ கொலோம்போ. தி காட் ஃபாதர் நாவலில் வரும் ஐந்து மாஃபியா குடும்பங்களின் பின்னனி மற்றும் இத்தாலியர்களை அதீத கொடூரமானவர்களாக காட்டியிருந்த அமைப்பு ஆகியவை படமாக உருவானால் தனக்கும் தன் குடும்பத்திற்க்கும் அவப்பெயரை உருவாக்கும் என்ற காரணத்தினால் தான் உருவாக்கிய இத்தாலிய அமெரிக்க குடியுரிமை அமைப்பின் மூலமாக படத்திற்கு எதிராக நியூயார்க் நகர வீதிகளில் பேரணி நடத்தினார், பேரணிக்கு ஆதரவாக இத்தாலியர்கள் ஒன்று திரண்ட போதிலும் படத்தை நிறுத்துவதற்கான சாத்திய கூறுகள் எதுவும் தென்படாததால் கதையில் காட்டப் பட்டிருக்கும் விட்டோ கார்லியோனின் அணுகுமுறையை போன்றே வன்முறை வழியை கையிலெடுத்தார். தயாரிப்பாளர் அல் ருட்டின் கார் கண்ணாடிகளை உடைத்து படத்தை உடனே நிறுத்துமாறும் இல்லையேல் பின்விளைவுகளை சந்திக்க நேரிடும் என்ற குறிப்பையும் விட்டுச்சென்றனர் அவரின் அடியாட்கள், அடுத்ததாக எவான்ஸை தொலைபேசியில் அழைத்து உடனே ஊரை காலி செய்யுமாறும் இல்லையேல் அவரது முகத்தை கிழித்து அவரின் குழந்தையையும் காயப்படுத்த போவதாக மிரட்டல் விடுத்தார். படப்பிடிப்பு நடைப்பெற்ற இடங்களில் எல்லாம் வன்முறை வெடிக்கவே மேற்கொண்டு படப்பிடிப்பை தொடரும் நிலை இல்லாமல் போனதால் கொலோம்போவை நேரடியாக சந்திக்கும் முடிவிற்கு வந்த பாரமவுண்ட் பிக்சர்ஸ் ஒரு ஹோட்டலில் அல் ருட்டியும் கொலோம்போவும் சந்திக்க ஏற்பாடு செய்தது. படத்தில் மாஃபியா என்ற வார்த்தையை நீக்க வேண்டும் மற்றும் தங்களது அமைப்புக்கு படம் வெளியானதும் நன்கொடை வழங்க வேண்டும் என்ற இரு கோரிக்கைகளை முன் வைத்தார் கொலோம்போ, ருட்டியும் அதற்கு சம்மதிக்கவே தன் இத்தாலிய அமெரிக்க குடியுரிமை அமைப்பு மூலமாக படத்திற்கு தேவையான எந்த உதவியையும் வழங்குவதாகவும் கூறினார் கொலோம்போ அதோடு நில்லாமல் ஜிகர்டண்டா அசால்ட் சேதுவைப் போல படப்பிடிப்பு நடக்கும் இடங்களிலெல்லாம் தவராமல் ஆஜர் ஆனார், டான் விட்டோ கார்லியோனின் மருமகன் கார்லோ ரிஷி பாத்திரத்தில் நடிக்க தன்னுடன் இருந்த கியானி ரூசோவை சிபாரிசு செய்து அவரை நடிக்கவும் வைத்தார். படம் முடிவதற்கு முன்னதாகவே சுடப்பட்டதால் கொலோம்போவின் இடைஞ்சல்களும் நின்றுவிட அவரது அமைப்புக்கும் எந்த ஒரு நங்கொடையையும் வழங்கும் நிலை பாரமவுண்ட் பிக்சர்ஸுக்கு வரவில்லை.

கொலோம்போவின் மெய்காவலரான லென்னி மாண்டெனோ டான் விட்டோ கார்லியோனின் மெய்காவலர் கதாப்பாத்திரமான லூக்கா பிராசியின் வேடத்திற்கு பொருத்தமாக இருந்ததால் அவரையும் நடிக்க வைத்தார் காப்போலோ. படத்தில் இவர் பிராண்டோவுடன் பேசும் காட்சியில் மிகவும் பதட்டத்துடன் காணப்பட்டார் எத்தனை முறை ஒத்திகை பார்த்திருந்தாலும், பிராண்டோ முன்னால் வந்து நின்றதும் இயல்பாக நடிக்க முடியவில்லை, திரும்ப திரும்ப இந்த காட்சியை ஒளிப்பதிவு செய்ய விரும்பாத காப்போலோ, இந்த காட்சிக்கு முன்பாக டான் விட்டோ கார்லியோனை சந்திக்கும் முன் லூக்கா பிராசி அவருடன் பேசுவதற்கான வசனத்தை ஒத்திகை பார்ப்பது போல் ஒரு புது காட்சி ஒன்றை அமைத்தார் அதன் மூலம் அவர் பதட்டத்துடன் நடித்து கொடுத்த அந்த காட்சியும் அந்த சூழலுக்கு ஏற்றவாறு பொருந்தியது.

நடிகர்கள் தங்களின் மாஃபியா கதாப்பாத்திரத்திற்கான உடல் மொழியை மேம்படுத்துவதற்காக உண்மையான மாஃபியா கும்பலை சார்ந்தவர்களுடனே தங்களது ஆய்வு பணியை தொடங்கினார்கள். பிராண்டோ பஃபொலினொ கும்பலை சார்ந்த ஒருவரை சந்தித்து தனது பாத்திரத்திற்கான உடல் மொழியை மேலும் மெருகேற்றினார். அல் பாசினோ, ஜேம்ஸ் கான், ராபர்ட் டுவாள் ஆகியோரும் தங்களது பாத்திரத்திற்கான ஆய்வுக்காக மாஃபியா கும்பலுடன் சுற்றித்திரிந்தனர். படத்தில் முக்கிய கதாப்பாதிரத்தில் நடித்திருக்கும் நடிகர்கள் ஒவ்வொருவரின் உடல்மொழியும் நிஜ மாஃபியாக்களிடம் இருந்து கற்று கொண்டது, இதர நடிகர்களோ ஏற்கனவே உண்மையான மாஃபியாக்களுடன் பணி புரிந்தவர்கள் என்பதால் அவர்களின் கதாப்பாத்திரத்திற்காக எந்த ஆய்வையும் மேற்கொள்ளும் அவசியம் இல்லாமல் போனது.

தொடரும்...

திகாட் ஃபாதர் - ஒரு வரலாறு (பகுதி2)

திகாட் ஃபாதர் - ஒரு வரலாறு (பகுதி3)

வெள்ளி, 21 ஆகஸ்ட், 2015

தி காட் ஃபாதர் - ஒரு வரலாறு (பகுதி3)

Posted by Thangaraj Pazhanee on 6:07 PM

மார்லன் பிராண்டோவை ஸ்க்ரீன் டெஸ்ட் செய்வதற்காக சிறிய வீடியோ ரெக்கார்டருடன் தயங்கியப்படியே பிராண்டோவின் வீட்டிற்குள் செல்கிறார் கப்போலோ. குதிரைவால் சடையுடன் தளர்ந்த உடையான கிமோனோ உடையில் தன் அறையில் இருந்து வெளியே வருகிறார் பிராண்டோ. கப்போலோ அங்கு வருவதற்கு முன்னதாகவே டான் விட்டோ கார்லியோனின் உருவமைப்பு மற்றும் குரல் இப்படி தான் இருக்க வேண்டும் என்று தன் மனதில் தோன்றியதை கண்ணாடியில் ஒத்திகை பார்த்திருந்தார் பிராண்டோ. கப்போலோவின் லென்ஸ் வழியாக மீண்டும் அவர் ஏற்கனவே ஒத்திகை செய்து வைத்திருந்த டான் விட்டோ கார்லியோனாக மாற தொடங்குகிறார் பிராண்டோ, ஒரு கசங்கிய சட்டையையும் மேல் அணியையும் உடுத்தி கொள்கிறார், கையில் சிறிது ஷூ பாலிஷ் எடுத்து தனது மீசையில் தடவிக் கொள்கிறார், டிஸ்யூ பேப்பரை சுருட்டி வாய்க்குள் திணித்து கொண்டே காட் ஃபாதரின் முகம் புல்டாக் என்ற வகை நாயின் முகத்தை ஒத்து இருந்தால் இன்னும் சிறப்பாக இருக்கும் என்கிறார் (இதைதான் நம்ம கமல் நாயகன் திரைப்படத்தில் வாயில் வெற்றிலை பாக்கு போட்டு கொண்டு செய்திருப்பார்), கதைப்படி காட் ஃபாதருக்கு தொண்டையில் ஏற்கனவே துப்பாகியால் சுடப்பட்டிருக்கும் என்பதற்காக தன்னுடைய குரலையும் அதற்கு ஏற்றார்போல மாற்றிக்கொண்டு கப்போலோ கொண்டு வந்திருந்த இத்தாலிய சுருட்டையும் வாயில் புகைத்தப்படியே பேசத்தொடங்குகிறார். டான் விட்டோ கார்லியோனாகவே மாறிப்போன பிராண்டோவை பார்த்து வாயடைத்து திகைத்து நிற்கிறார் கப்போலோ. அவர் பதிவு செய்த விடியோவை பாரமவுண்ட் நிர்வாகிகளுக்கு போட்டு காண்பித்தார் கப்போலோ, யாருக்குமே விடியோவில் இருப்பது பிராண்டோ தான் என்பதை கப்போலோ சொல்லாமல் அறிந்து கொள்ள முடியவில்லை. விட்டோ கார்லியோன் வேடத்திற்கு மிகப்பொருத்தமானவர் பிராண்டோ தான் என்பதை பாரமவுண்ட் நிர்வாகிகளாலும் மறுக்க முடியாமல் போகவே அந்த பாத்திரத்தில் நடிக்க அவரையே ஒப்பந்தம் செய்தது.

திரைப்படத்திற்கான நடிகர்களை தேர்ந்தெடுப்பதில் சிக்கல் பிராண்டோவோடு நின்றிடவில்லை, டான் விட்டோ கார்லியோனுக்கு அடுத்தப்படியாக முக்கியத்துவம் வாய்ந்த பாத்திரமான மைக்கேல் கார்லியோனின் கதாபாத்திர தேர்விலும் எதிர்மறையாகவே நின்றனர் கப்போலோவும் பாரமவுண்ட் பிக்சர்ஸும். ஏதோ ஒரு நாடகத்தில் அல்பசினோவை பார்த்த கப்போலோ அவரின் முக அமைப்பு கதைக்கு ஏற்ற சிசிலி நகரத்தவர்களின் தோற்றத்தை ஒத்திருந்துப்படியால் மைக்கேல் கார்லியோன் கதாப்பாத்திரத்திற்கான சரியான தேர்வு அவர் தான் என்று முடிவு செய்து வைத்திருந்தார், ஆனால் அந்த நேரத்தில் அல்பசினோவோ யாருமே அறிந்திடாத ஒரு நாடக நடிகராய் இருந்தார் மைக்கேல் கார்லியோன் பாத்திரத்திற்காக அவருக்கு எடுத்த ஸ்க்ரீன் டெஸ்டிலும் அவர் சரியாக நடித்து காட்டவில்லை, மேலும் அவரது குள்ளமான உயரம் மைக்கேல் கார்லியோன் பாத்திரத்திற்கு பொருந்தாது என்பதாகவே உணர்ந்தது பாரமவுண்ட் பிக்சர்ஸ் ஆகவே அந்த பாத்திரத்திற்கு கொஞ்சம் பிரபலமான நடிகர்களான ஜேம்ஸ்கான், வாரன் பீட்டி அல்லது ஜாக் நிக்கல்சன் போன்றவர்களில் எவரையாவது நடிக்க வைக்கலாம் என்று பரிந்துரை செய்தது, கப்போலோ இதற்கு சம்மதிக்கவில்லை, படத்தை ஆரம்பிப்பதற்கான தேதியும் நேருங்கியப்படியால் அல் பசினோவையே அந்த கதாபாத்திரத்தில் நடிக்க வைக்க அரைமனதுடன் அனுமதித்தது.

விட்டோ கார்லியோனின் மகள் கானி கார்லியோனின் பாத்திரத்தை கப்போலோவின் சகோதரியான டாலியா செயரிடம் தர எவான்ஸ் விளைந்தும் அதை ஏற்க கப்போலோ முன் வரவில்லை. டாலியா செயரின் இயல்பு அந்த கதாப்பாத்திரத்திற்கு பொருந்தாது என்பதாகவே கப்போலோ உணர்ந்தார், இருப்பினும் புசோவின் வேண்டுகோளுக்கிணங்க எடுக்கப்பட்ட ஸ்க்ரீன் டெஸ்டை பார்த்த பின் அவரையே நடிக்க வைக்க சம்மதித்தார். விட்டோ கார்லியோனின் மூத்த மகனான சன்னி கார்லியோன் பாத்திரத்தில் நடிக்க ஜேம்ஸ் கானையும், விட்டோ கார்லியோனின் தத்து மகன் மற்றும் குடும்பத்தின் சட்ட ஆலோசகராக வரும் டாம் ஹாகேன் பாத்திரத்தில் நடிக்க ராபர்ட் டுவாளையும் தேர்வு செய்தார். படத்தின் மற்ற காதாப்பாத்திரத்திற்கான நடிகர்களையும் அதுவரை மக்களிடம் பிரபலமாகாத இத்தாலிய அமெரிக்க நடிகர்களையே தேர்வு செய்தார் கப்போலோ.

தொடரும்...

திகாட் ஃபாதர் - ஒரு வரலாறு (பகுதி2)

புதன், 19 ஆகஸ்ட், 2015

தி காட் ஃபாதர் - ஒரு வரலாறு (பகுதி2)

Posted by Thangaraj Pazhanee on 10:16 PM

தி காட் ஃபாதர் புத்தகம் மிகப்பெரிய வெற்றியடைந்த மகிழ்ச்சியில் நாவலை திரைப்படம் ஆக்குவதற்கான அடுத்தக்கட்ட வேலைகளில் இறங்கியது பாரமவுண்ட் பிக்சர்ஸ். புத்தகத்தை வாசித்த நடிகர் பர்ட் லங்காஸ்டருக்கோ முக்கிய கதாபாத்திரமான டான் விட்டோ கார்லியோனின் கதாபாத்திரத்தில் தான் தான் நடிக்க வேண்டும் என்ற ஆவலில் படத்தின் உரிமையை வாங்க போட்டி களத்தில் குதித்தார் எனினும் முக்கியத்துவம் வாய்ந்த அந்த கதாப்பாத்திரத்தில் அவரை நடிக்க வைக்க ராபர்ட் எவான்ஸுக்கு விருப்பமில்லை. பாரமவுண்ட் பிக்சர்ஸுக்கு அந்த நாட்களில் இருந்த நெருக்கடி காரணமாக படத்தின் வேலைகளை உடனே தொடங்கியாக வேண்டுமென்றும் மேலும் தாமதமானால் பர்ட் லங்காஸ்டருக்கு படத்தின் உரிமையை விற்றுவிடப் போவதாகவும் மேலிடத்திலிருந்து எவான்ஸிற்கு தகவல் வந்தது. படத்தின் இயக்குனரை தேர்ந்தெடுக்கும் வேலையில் உடனடியாக இறங்கினார் எவான்ஸ். படத்தை இயக்குவதற்காக முதலாவதாக பேசப்பட்டது இயக்குனர் ரிச்சர்ட்ஸ் ப்ரூக்சிடம் அவரோ புசோவின் கதையிலிருக்கும் அதீத வன்முறை காரணமாக படத்தை இயக்க மறுத்துவிட்டார் தொடர்ந்து மேலும் பதினொரு இயக்குனர்களும் பல்வேறு காரணங்களுக்காக புசோவின் கதையை இயக்குவதற்கு மறுத்துவிட்டனர். பன்னிரண்டு இயக்குனர்களால் மறுக்கப்பட்ட கதையை எடுக்க கடைசியாக தேர்வு செய்யப்பட்டவர் பிரான்சிஸ் ஃபோர்ட் கப்போலோ, எந்த ஒரு பெரிய வெற்றியையும் அதுவரை பெற்றிடாத ஒரு இயக்குனரை நம்பி படத்தை ஒப்படைப்பதை எவான்ஸ் விரும்பவில்லை என்ற போதிலும் அந்த சமயத்தில் அந்த கதையை இயக்க வேறு மாற்று இயக்குனர்கள் இல்லாததாலும் மேல் இடத்திலிருந்து வந்த நெருக்கடியினாலும், மேலும் கப்போலோ இத்தாலிய பாரம்பரியத்தை சார்ந்தவர் என்பதால் அந்த கதையை திரை விடிவில் கொண்டு வருவது அவருக்கு சுலபம் என்ற நம்பிக்கையிலும் கப்போலோவை யே இயக்க வைக்க எவான்ஸும் சம்மதித்தார்.

நாவலை படமாக்குவது என்பதில் கப்போலோவுக்கு உடன்பாடு இருந்ததில்லை என்ற போதிலும் தன் குடும்பத்தில் அச்சமயம் நிலவிய பண சிக்கல்கள் காரணமாக அவரும் படத்தை இயக்க சம்மதித்தார் அதுவும் அதற்கு முந்தைய படங்களில் அவர் வாங்கிய தொகையை விடவும் குறைவான தொகைக்கே ஒப்பந்தம் செய்யப்பட்டார். அதுவரை திரைக்கதை அமைக்கும் பணியில் தனியாக ஈடுபட்டிருந்த புசோவுடன் கப்போலோவும் இணைந்தார் பின் திரைக்கதை அமைக்கும் பணியும் வேகம் பிடித்தது. நாவலில் உள்ள முக்கியமான குறிப்புகளை எல்லாம் தான் தினமும் பார்க்கும் இடங்களில் ஓட்டி வைத்து கொண்டு கதைக்குள் ஆழமாக ஊடுருவி சென்றார் கப்போலோ. புசோவின் நாவலை திரைப்பட வடிவத்திற்கு கொண்டு வருவதில் இரண்டு விசயங்களில் மிகவும் உறுதியாய் இருந்தார் கப்போலோ ஒன்று திரைப்படத்தின் காலக்கட்டம் நாவலில் சொல்லப்பட்ட 1940களில் நடைபெறுவது போலவே அமைப்பது என்பதிலும் கதைக்கு தொடர்புடைய நியூயார்க் நகரிலேயே படமாக்கப்படவேண்டும் என்பதிலும். இந்த இரண்டு விசயங்களுமே பாரமவுண்ட் பிக்சர்ஸின் பட்ஜெட்டிற்கு அப்பாற்பட்டது முதலில் அவர்கள் அதற்கு சம்மதிக்கவில்லை என்ற போதும் இந்த கதைக்களத்திற்கு இந்த இரண்டு விசயங்களுமே இன்றியமையாதது என்று கப்போலோ எடுத்துரைக்கவே பின்னர் அரை மனதோடு சம்மதித்தது.

படத்தின் ஆரம்பக்கட்ட படப்பிடிப்பின் போது அடிக்கடி நடிகர்களை மாற்றியும் எடுக்கப்பட்ட காட்சிகளின் மேல் திருப்தி இல்லாமல் மீண்டும் மீண்டும் எடுத்த படியால் படத்தின் செலவு அதிகமாகிக்கொண்டே போனது இதனை சற்றும் எதிர்பார்க்காத பாரமவுண்ட் பிக்சர் ஸோ கார்லியோனை வெளியேற்றிவிட்டு வேறு இயக்குனரை வைத்து படத்தை முடித்து கொள்ளலாம் என்ற முடிவுக்கு வந்தனர். அப்போதெல்லாம் ஒருவரை நீக்கும் அறிவிப்பை வெள்ளிக்கிழமைகளில் மட்டுமே வெளியிடுவர் காரணம் அடுத்து வரும் இரண்டு விடுமுறை நாட்கள் இடைவெளியில் அந்த இடத்திற்கான புதியவரை இயல்பாய் பொருத்தி கொள்ளலாம் என்ற நம்பிக்கையில். கார்லியோனை நீக்கப்போகும் செய்தி கார்லியோனுக்கு புதன்கிழமை அன்றே தெரியவர இந்த பிரச்சனையில் இருந்து தன்னை காத்துக்கொள்ள ஒரு வித்தியாசமான முடிவை எடுத்தார் கார்லியோன் அதுவரை அவருடன் பணிபுரிந்த 15 பேரை புதன்கிழமை அன்றே வெளியேற்றினார் இதனால் அந்த படத்தின் அனைத்து விசயங்களையும் அறிந்த ஒரே ஒருவர் தாம் மட்டுமே இருக்கிறார் என்பதை உணரச்செய்யவே அப்படி செய்தார் பாரமவுண்ட் பிக்சர்சும் வேறு வழியின்றி இறங்கி வந்தனர். படத்தை தொடங்கி முடிக்கும் வரையிலும் கத்தியின் மேல் நடக்கும் நிலை தான் கப்போலோவுக்கு. அவரை எந்த நேரத்திலும் வெளியேற்றும் நிலை தொடர்ந்தாலும் எல்லா சிக்கலான நேரத்திலும் அவரின் தலையை காத்தவர் அந்த திரைப்படத்தின் முக்கியமான கதாபாத்திரமான விட்டோ கார்லியோன் கதாபாத்திரத்திற்கு கப்போலோவால் தேர்ந்தெடுக்கப்பட்ட மார்லன் பிராண்டோ.

டான் விட்டோ கார்லியோனின் கதாப்பாத்திரத்தில் நடிக்க நடிகர்களை தேர்ந்தெடுக்கும் நேரத்தில் அந்த கதாப்பாத்திரத்தில் நடிக்க மார்லன் பிராண்டோ தான் சரியான ஆள் என்ற கருத்தை முன் வைத்தார் புசோ அதற்கு மிக முக்கிய காரணமாக அவர் கூறியது அந்த கதாப்பாத்திரத்தின் படைப்பு மார்லன் பிராண்டோவுக்கு மட்டுமே ஒத்து போகும் என்றார் புசோ, முன்னரே அவரது கைப்பட ஒரு கடிதத்தையும் பிராண்டோவிற்கு அனுப்பியிருந்தார் அதில் அவர் கூறியிருந்ததாவது “என்னுடைய நாவலான தி காட் ஃபாதரில் வரும் முக்கிய பாத்திரமான காட் ஃபாதராக நடிப்பதற்கு தாங்கள் ஒருவர் தான் சிறந்தவர் என்பதாக உணர்கிறேன் எனது இந்த கருத்தை பாரமவுண்ட் பிக்சர் ஸுக்கும் அனுப்பியுள்ளேன்” என்பதே. கப்போலோவின் பட்டியலில் இருந்தவர்கள் இருவர் ஒருவர் லாரன்ஸ் ஒலிவியர் மற்றவர் புசோவின் விருப்பத்திற்குரிய மார்லன் பிராண்டோ. மார்லன் பிராண்டோவோ தயாரிப்பு நிறுவனம் விதிக்கும் எந்த ஒரு கட்டுபாட்டிற்குள்ளும் தன்னை அடைத்துகொள்ள அனுமதிக்க மாட்டார் மேலும் அந்த காலகட்டத்தில் அவர் சில தோல்விகளையும் சந்தித்திருந்த காரணத்தினால் பாரமவுண்ட் பிக்சர்ஸோ அவர் நடிப்பதை ஏற்கவில்லை லாரன்ஸ் ஒலிவியரை நடிக்க வைக்க பாரமவுண்ட் பிக்சர்ஸ் சம்மதித்த போதிலும் அவரின் உடல்நிலை அச்சமயத்தில் ஒத்துவராத காரணத்தினால் படத்தில் நடிக்க அவரும் முன் வரவில்லை. பின் மார்லன் பிராண்டோவை நடிக்க வைக்க ஒரு நிபந்தனையை முன் வைத்தது பாரமவுண்ட் பிக்சர்ஸ், அறிமுக நடிகர்களை தேர்ந்தேடுப்பதர்காக செய்யப்படும் ஸ்க்ரீன் டெஸ்டில் அவர் பங்கேற்க வேண்டும் என்றும் வலியுறுத்தியது. கப்போலோவின் வற்புறத்தல் காரணமாக மார்லன் பிராண்டோவும் அதற்கு சம்மதித்தார்.

தொடரும்…